কাজিৰঙা ৰাষ্ট্ৰীয় উদ্যানৰ বুঢ়াপাহাৰ আৰু বাগৰি বনাঞ্চলত ঢেকীয়াপতীয়া বাঘৰ মৃতদেহ উদ্ধাৰ :

Aiidesh News : 24 August - 2025  :

কাজিৰঙা ৰাষ্ট্ৰীয় উদ্যান বুঢ়াপাহাৰ আৰু বাগৰি বনাঞ্চলত ২৩ আগষ্টৰ বিয়লি পৃথক পৃথক স্থানত দুটাকৈ ঢেকীয়াপতীয়া বাঘৰ মৃতদেহ উদ্ধাৰ হয় ৷ ৰাষ্ট্ৰীয় উদ্যানৰ বুঢ়াপাহাৰ বনাঞ্চলৰ পানীজুৰি বনশিৱিৰ এলেকাত আৰু বাগৰি বনাঞ্চলৰ পশ্চিম দেওপানী বনশিৱিৰ এলেকাত ঢেকীয়াপতীয়া বাঘৰ এই মৃতদেহ দুটা কৰ্মৰত বনকৰ্মীয়ে প্ৰত্যক্ষ কৰে ৷ আজি পুৱা ৰাষ্ট্ৰীয় উদ্যানখনৰ বন সংমণ্ডল বিষয়া অৰুণ বিঘ্নেশ, সহকাৰী বন সংৰক্ষক বুবুল বৰুৱাৰ আৰু পশু চিকৎসক ডা৹ মোহিত নাউলৰ নেতৃত্বত যোৱা বনকৰ্মীৰ দলে প্ৰথমতে বুঢ়াপাহাৰত উদ্ধাৰ হোৱা ঢেকীয়াপতীয়া বাঘটোৰ মৃতদেহৰ মৰোনোত্তৰ পৰীক্ষা কৰে ৷ বুঢ়াপাহাৰৰ বনাঞ্চলিক বিষয়া নিলয় বৰুৱাৰ উপস্থিতিত কৰা এই মৰোনোত্তৰ পৰীক্ষাৰ শেষত বাঘৰ পোৱালীটো অন্য বাঘৰ আক্ৰমনত মৃত্যু হোৱা বুলি পশু চিকিৎসকে জানিবলৈ দিয়ে ৷ ছমাহৰ পৰা এবছৰীয়া বয়সৰ এই মতা ঢেকীয়াপতীয়া বাঘৰ পোৱালীটোক অন্য বাঘে হত্যা কৰি একাংশ ভক্ষণো কৰে ৷ দুদিনৰ আগত মৃত্যু হোৱা বাঘটো ইতিমধ্যেই নষ্ট হ’বলৈ আৰম্ভ কৰিছিল ৷

পৰৱৰ্তী সময়ত ডি এফ অ’ৰ লগত যোৱা পশু চিকিৎসক ডা৹ মোহিত নাউলে বনাঞ্চলিক বিষয়া বিবিত দিহিঙীয়াৰ সহযোগত বাগৰি বনাঞ্চলৰ পশ্চিম দেওপানীৰ বিলৰ পাৰত উদ্ধাৰ হোৱা ঢেকীয়াপতীয়া বাঘটোৰ মৰোনোত্তৰ পৰীক্ষা কৰে ৷ তিনি চাৰিদিনৰ আগতেই বাৰ্ধক্যজনিত কাৰনতে মৃত্যু হোৱা ঢেকীয়াপতীয়া বাঘটোৰ মৃতদেহ ইতিমধ্যেই উৱলি গৈ অকল হাঁড়বোৰহে বাছি আছিল ৷ শৰীৰ অৱশিষ্ট আৰু হাঁড় মুৰ সহ কংকালৰ বিভিন্ন দিশ পৰীক্ষা কৰি পশু চিকিৎসকে প্ৰাপ্ত বয়স্ক এই বাঘটো বাৰ্ধক্য জনিত কাৰণতে মৃত্যু হোৱা বুলি জানিবলৈ দিয়ে ৷ বাগৰি বাঘটোৰ শৰীৰৰ পিচৰ অংশৰ হাঁড় ভাঙি থকা বিপৰীতে দাঁতো ক্ষয় যোৱা অৱস্থাত পোৱা যায় ৷ মৰোনোত্তৰ পৰীক্ষাৰ পিচত দুয়োটা বাঘৰ মৃতদেহ ৰাষ্ট্ৰীয় ব্যাঘ্ৰ সংৰক্ষণ প্ৰাধিকৰণৰ প্ৰট’কল মতে ঘটনাস্থলিতে প্ৰাধিকৰণৰ প্ৰতিনিধিৰ উপস্থিতিত জ্বলাই দিয়া হয় ৷

********