ভাবুকিৰ পাছতে ট্রাম্পৰ সুৰ সলনি, মোদীক উচচ প্রশংসা

আমেৰিকাক হাইড্রক্সিক্লৰ’কুইন টেবলেট যোগান নধৰিলে ভাৰতে গুৰুতৰ পৰিণাম ভোগ কৰিব লাগিব বুলি আমেৰিকাৰ ৰাষ্ট্রপতি ড’নাল্ড ট্রাম্পে ভাৰতক ভাবুকি দিয়াৰ এদিনৰ পাছতে ট্রাম্পে সুৰ সলনি কৰিলে৷ আমেৰিকাত কভিড-১৯ ৰোগীৰ সংখ্যা দ্রুত বৃদ্ধি পোৱাৰ কাৰণে ৰোগীসকল আৰু চিকিৎসা কর্মীসকলৰ বাবে মেলেৰিয়া-প্রতিৰোধী হাইড্রক্সিক্লৰ’কুইন বিচাৰি ট্রাম্পে ভাৰতক আহবান জনাইছিল৷

কডিভ-১৯ত এই ঔষধটোৱে কাম দিয়ে বুলি চিকিৎসা বিজ্ঞানীসকলে প্রকাশ কৰাৰ পাছত আন বহু দেশে ভাৰতৰ পৰা এই ঔষধ বিচাৰিছে৷ ভাৰতক ভাবুকি দিয়াৰ পাছত ট্রাম্পে এতিয়া সুৰ সলনি কৰি প্রধানমন্ত্রী নৰেন্দ্র মোদীক প্রশংসা কৰিছে৷ তদুপৰি, কৰ’না ভাইৰাছৰ মহামাৰী চম্ভলাত লোৱা ব্যৱস্থাৰ বাবে ভাৰতকো তেওঁ প্রশংসা কৰিছে৷

ট্রাম্পে কয় যে আমেৰিকাই ভাৰতৰ পৰা ১৯ মিলিয়ন (২ কোটি ৯০ লাখ) হাইড্রক্সিক্লৰ’কুইন আনিলে আৰু এতিয়া ভাৰতকো এই ঔষধৰ প্রয়োজন হোৱাত তেওঁলোকে ঔষধবিধৰ ৰপ্তানি বন্ধ কৰিছে৷ বক্স নিউজক দিয়া এই সাক্ষাৎকাৰত ট্রাম্পে কয়, ‘মই কোটি কোটি হাইড্রক্সিক্লৰ’কুইন আনিলোঁ৷ ২৯ মিলিয়নতকৈও বেছি৷

মই প্রধানমন্ত্রী মোদীৰ সৈতে কথা পাতিছিলোঁ, ইয়াৰ (হাইড্রক্সিক্লৰ’কুইন) যথেষ্টখিনি আহিছে ভাৰতৰ পৰা৷ মই তেওঁক সুধিছিলোঁ আৰু দিব নেকি? তেওঁ মহান৷ তেওঁ সঁচাই ভাল৷ ভাৰতকো এই ঔষধৰ প্রয়োজন হৈছে৷ সেই কাৰণে তেওঁলোকে বন্ধ কৰি দিছে৷’ উল্লেখযোগ্য যে ট্রাম্পৰ ভাবুকিৰ পাছত কালি ভাৰতে কৈছিল যে হাইড্রক্সিক্লৰ’কুইন আৰু পেৰচিটামলৰ ঘৰুৱা প্রয়োজন কিমান সেইটো প্রথমতে বিবেচনা কৰা হ’ব আৰু তাৰ পাছতহে বিদেশলৈ ৰপ্তানি কৰা হ’ব৷

প্রথমতে ভাৰতৰ প্রয়োজন পূৰণ কৰা হ’ব আৰু কিমান ঔষধৰ প্রয়োজন হ’ব সেইটো নির্ধাৰণ কৰা হ’ব৷ তাৰ পাছত বাকী ৰোৱা ঔষধ বিদেশলৈ ৰপ্তানি কৰা হ’ব৷ আন বহু দেশে ভাৰতৰ পৰা এই ঔষধ বিচাৰিছে৷ উল্লেখযোগ্য যে ট্রাম্প আৰু মোদীয়ে যোৱা সপ্তাহত ফ’নত কথা পাতিছিল আৰু তেতিয়া ট্রাম্পে হাইড্রক্সিক্লৰ’কুইনৰ বাবে আমেৰিকাই দিয়া অর্ৰৰ ক্ষেত্রত ভাৰতে আৰোপ কৰা নিষেধাজ্ঞা প্রত্যাহাৰ কৰিবলৈ মোদীক আহবান জনাইছিল৷

ভাৰত এই ঔষধ উৎপাদন কৰা অন্যতম বৃহৎ দেশ৷ আমেৰিকাৰ খাদ্য আৰু ঔষধ প্রশাসনে এই ঔষধ কভিড-১৯ৰ সম্ভাব্য চিকিৎসা বুলি চিনাক্ত কৰিছে আৰু নিউয়র্কত ১৫০০ কৰ’না ভাইৰাছ ৰোগীক দি পৰীক্ষা চলোৱা হৈছে৷ ইফালে, নিউজার্ছি ভিত্তিক আমনীল ফার্মাচিউটিকেলছ নামৰ এটা ঔষধ উৎপাদনকাৰী প্রতিষ্ঠানে আমেৰিকাক ৩.৪ মিলিয়ন হাইড্রক্সিক্লৰ’কুইন ছালফেট টেবলেট দান দিবলৈ অংগীকাৰ কৰিছে৷ এই কোম্পানীটোৰ গৰাকী ভাৰতীয় আমেৰিকান বিলিয়নাৰ চিৰাগ আৰু চিণ্টু পেটেল৷