গাভাস্কাৰে দিলে ৫৯ লাখ টকাৰ অনুদান
AIIDESH NEWSDESK
Apr 8, 2020 04:33
756
0
কৰ’না ভাইৰাছৰ দ্রুত সম্প্রসাৰণৰ ফলত গোটেই দেশেই এক কঠিন সময় অতিবাহিত কৰিবলৈ বাধ্য হৈছে৷ আনকি এই ভাইৰাছক ৰোধ কৰাৰ স্বার্থত স্বয়ং প্রধানমন্ত্রী নৰেন্দ্র মোদীয়ে ২১ দিনীয়া দেশব্যাপি লকডাউনৰ আহবান কৰিবলগীয়া পৰিস্থিতিৰ উদ্ভৱ হৈছে৷ কৰ’না ভাইৰাছৰ বিৰুদ্ধে দেশৰ এই সর্বস্তৰৰ যুঁজলৈ সমাজৰ বিভিন্ন ক্ষেত্রৰ ব্যক্তিয়ে সহায়ৰ হাত আগবঢ়াইছে৷
এইক্ষেত্রত পিছ পৰি নৰ’ল ভাৰতৰ ক্রিকেট দলটোৰ প্রাক্তন অধিনায়ক তথা লিটল মাষ্টাৰ খ্যাত সুনীল গাভাস্কাৰো৷ এই দিশত গাভাস্কাৰক কিছু ব্যতিক্রমো বুলিব পাৰি৷ কিয়নো তেওঁ আগবঢ়োৱা সাহায্যৰ বিষয়ে ভুলতো ক’তো প্রকাশ কৰা নাছিল৷
পিছে মুম্বাইৰ প্রাক্তন অধিনায়ক অমল মজুমদাৰৰ এক টুইটেহে এই কথা পোহৰলৈ আনে৷ ‘এইমাত্র শুনিলোঁ যে সুনীল মনোহৰ গাভাস্কাৰে কভিড সাহায্য পুঁজিলৈ ৫৯ লাখ টকা দান দিছে৷ ইয়াৰ ৩৫ লাখ টকা প্রধানমন্ত্রী সাহায্য পুঁজিলৈ আৰু ২৪ লাখ টকা মহাৰাষ্ট্রৰ মুখ্যমন্ত্রী সাহায্য পুঁজিলৈ আগবঢ়াইছে৷
প্রশংসনীয় কাম ছাৰ৷’ মজুমদাৰে এইদৰে টুইট কৰে৷ ইফালে কভিড-১৯ৰ সংক্রমণৰ বিৰুদ্ধে যুঁজলৈ ভাৰতীয় টেষ্ট দলৰ নির্ভৰযোগ্য মিডল অর্ৰ বেটছমেন চেতেশ্বৰ পূজাৰাইও সহযোগ আগবঢ়াইছে৷ তেওঁ কিমান টকাৰ সাহায্য আগবঢ়াইছে প্রকাশ নকৰিলেও দেশৰ জনসাধাৰণক এইক্ষেত্রত আগবাঢ়ি আহিবলৈ আহবান জনায়৷
