দশম সংযোজন হিচাবে বিশ্বনাথ জিলাৰ মোনাবাৰী বনাঞ্চল কাজিৰঙাত অন্তৰ্ভুক্ত : অসম চৰকাৰৰ ঘোষণা :

দশম সংযোজন হিচাবে বিশ্বনাথ জিলাৰ মোনাবাৰী বনাঞ্চল কাজিৰঙাত অন্তৰ্ভুক্ত :  অসম চৰকাৰৰ ঘোষণা  : 

Aiidesh News : 10 November  :

অসম চৰকাৰৰ পৰিবেশ আৰু বন মন্ত্ৰালয়ৰ আয়ুক্ত সচিবয়ে যোৱা ৮ নবেম্বৰত জাৰি কৰা FRM.203/2017/83 নম্বৰৰ প্ৰাৰম্ভিক জাননীৰে বিশ্বনাথৰ মোনাবাৰী অঞ্চলৰ ৪৫২ হেক্টৰ ভুমিক কাজিৰঙা ৰাষ্ট্ৰীয় উদ্যানৰ দশম সংযোজন হিচাবে ঘোষণা কৰে ৷ এই ঘোষণাৰে অসম চৰকাৰে মোনাবাৰী চাহ বাগিচাৰ লগতে থকা এই ৪৫২ হেক্টৰ ভুমিক কাজিৰঙা ৰাষ্ট্ৰীয় উদ্যানৰ সৈতে অন্তৰ্ভুক্ত কৰা হ’ল ৷ 

কাজিৰঙা ৰাষ্ট্ৰীয় উদ্যান কৰ্তৃপক্ষই জনোৱা মতে বিশ্বনাথ জিলাৰ মোনাবাৰী চাহ বাগিছাৰ সৈতে সংলগ্নিত এই ৪৫২ হেক্টৰ ভূমিত ভূমি সংৰক্ষণ বিভাগে  ১৯৬২ চনতে বৃক্ষ ৰোপণ কৰিছিল আৰু তেতিয়াৰে পৰাই গঢ়ি উঠিছিল এক বনাঞ্চল ৷ মোনাবাৰীৰ এই বনাঞ্চলত বিভিন্ন সময়ত কাজিৰঙা ৰাষ্ট্ৰীয় উদ্যানৰ পৰা  যোৱা বন্যপ্ৰাণীয়ে আশ্ৰয় লৈ আহিছিল । ২০০৬ চনতে এই বনানঞ্চলক বন বিভাগক অৰ্পণ কৰা হৈছিল যদিও আনুষ্ঠানিক ভাৱে কাজিৰঙা ৰাষ্ট্ৰীয় উদ্যানক অৰ্পণ কৰা হোৱা নাছিল ৷ বন বিভাগৰ হাতলৈ অহাৰ পিচতেই মোনাবাৰী বনাঞ্চলত বন শিৱিৰ স্থাপন কৰি বন কৰ্মীও নিয়োগ কৰা হৈছিল ৷

শেহতীয়াকৈ কাজিৰঙা ৰাষ্ট্ৰীয় উদ্যান কৰ্তৃপক্ষই অসম চৰকাৰক কাজিৰঙা ৰাষ্ট্ৰীয় উদ্যানৰ বন্যপ্ৰাণীৰ সুৰক্ষাৰ বাবে এই ৪৫২ হেক্টৰ বনাঞ্চলৰ প্ৰয়োজন বুলি অৱগত কৰাৰ পিচত অসম চৰকাৰে মোনাবাৰী চাহ বাগিচাৰ এই ভূমি কাজিৰঙা ৰাষ্ট্ৰীয় উদ্যানৰ দশম সংযোজন হিচাপে প্ৰাৰম্ভিক ভাৱে ঘোষণা কৰে ।  

উদ্যান কৰ্তৃপক্ষই প্ৰকাশ কৰা তথ্য মতে নগাঁও জিলাৰ অন্তৰ্গত দেওচূড় আৰু পালখোৱাৰ ১৭৬ হেক্টৰ ভূমিক সপ্তম সংযোজন , বান্দৰডুবি এলেকাৰ ৩০৭ হেক্টৰ ভূমিক অষ্টম সংযোজন আৰু শোণিতপুৰ জিলাৰ জীয়া ভৰলীৰ কাষৰ নামেৰি ৰাষ্ট্ৰীয় উদ্যান সংযোগী মকোৱা চাপৰি ২৫৭০ হেক্টৰ ভূমিক  কাজিৰঙাৰ নৱম সংযোজন হিচাবে ঘোষণা কৰাৰ পিচত এতিয়া মোনাবাৰীৰ ৪৫২ হেক্টৰ বনাঞ্চলক কাজিৰঙা ৰাষ্ট্ৰীয় উদ্যানৰ দশম সংযোজন হিচাবে ঘোষণা কৰিছে অসম চৰকাৰে ৷

দশম সংযোজন হিচাবে  মোনাবাৰী বনাঞ্চল সংযোজন হোৱাৰ পিচত কাজিৰঙা ৰাষ্ট্ৰীয় উদ্যানৰ পৰিসৰ সম্প্ৰতি ৯১৫ বৰ্গ কিলোমিটাৰৰ পৰা ৯২৫ বৰ্গ কিলোমিটাৰলৈ লৈ বৃদ্ধি পালে ৷  

********