কাজিৰঙাৰ সাংবাদিক ধ্ৰুৱজ্যোতি সাহাৰ দবা খেলৰ ৰাষ্ট্ৰীয় জ্যেষ্ঠ আৰবিটাৰৰ যোগ্যতা অৰ্জন :

Aiidesh News :  7 December - 2024 : 

আন্তঃৰাষ্ট্ৰীয় ফিডে ৰেটেড দবাৰু কাজিৰঙাৰ ধ্ৰুৱজ্যোতি সাহাই ৰাষ্ট্ৰীয় জ্যেষ্ঠ আৰবিটাৰৰ যোগ্যতা অৰ্জন কৰিছে ৷ ৫ ডিচেম্বৰত অল ইণ্ডিয়া চেছ ফেডাৰেচন চমুকৈ এ আই চি এফৰ দ্বাৰা তেওঁলোকৰ ৱেবছাইট যোগে ধ্ৰুৱজ্যোতি সাহালৈ এই স্বীকৃতি আগবঢ়ায় ৷ উল্লেখ্য যে বিগত ১৮ টা বছৰে সাংবাদিকতাৰ স’তে জড়িত হৈ আছে ধ্ৰুৱজ্যোতি সাহা ৷ পৰিৱেশ সাংবাদিকতা বঁটা, পৰ্যটন সাংবাদিকতা বঁটাকে বিভিন্ন বঁটা-সন্মানেৰে কাজিৰঙা অঞ্চললৈ গৌৰৱ কঢ়িয়াই অনা সাংবাদিক সাহাই সৰুৰেপৰা দবা খেলৰ প্ৰতি আগ্ৰহী আছিল ৷ বহুকেইখন আন্তঃৰাষ্ট্ৰীয় ৰেটিং খেলত অংশগ্ৰহণ কৰিবলৈ সক্ষম হোৱা ধ্ৰুৱজ্যোতি সাহাই যোৱা ২৮ আৰু ২৯ মে’ত নগালেণ্ডৰ ডিমাপুৰত অনুষ্ঠিত হোৱা দবা খেলৰ ৰাষ্ট্ৰীয় জ্যেষ্ঠ আৰবিটাৰৰ চেমিনাৰত অংশগ্ৰহণ কৰিছিল ৷ এই চেমিনাৰত নগালেণ্ডৰ বিভিন্ন অংশগ্ৰহণকাৰীৰ উপৰিও অসম তথা উত্তৰ-পূৰ্বাঞ্চল আৰু ঝাৰখণ্ডৰ দবাৰুয়েও অংশগ্ৰহণ কৰিছিল ৷ এই চেমিনাৰৰ পাছতেই অনুষ্ঠিত ৰাষ্ট্ৰীয় জ্যেষ্ঠ আৰবিটাৰৰ পৰীক্ষা বহিবলৈ যোগ্যতা অৰ্জন কৰে ২৭ গৰাকী প্ৰশিক্ষাৰ্থীয়ে ৷ এই পৰীক্ষাত সাংবাদিক সাহাই ৮০ শতাংশৰ অধিক নম্বৰ লাভেৰে 'এ' গ্ৰেডত উত্তীৰ্ণ হ’বৰ সক্ষম হয় ৷ ইয়াৰ লগে লগেই ধ্ৰুৱজ্যোতি সাহাই ৰাষ্ট্ৰীয় জ্যেষ্ঠ আৰবিটাৰৰ যোগ্যতা অৰ্জন কৰে ৷ এই পৰীক্ষাত অসমৰ ৰেজাবুল হক, নন্দন বুঢ়াগোহাঁই, মৃণাল কাকতি আৰু শংকৰ বৰুৱাই এ গ্ৰেড পাবৰ সক্ষম হয় ৷ ধ্ৰুৱজ্যোতি সাহা গোলাঘাট জিলাখনৰ ভিতৰতে চতুৰ্থগৰাকী ৰাষ্ট্ৰীয় জ্যেষ্ঠ আৰবিটাৰ ৷ ইতিপূৰ্বে গোলাঘাট জিলা দবা সন্থাৰ সভাপতি ডায়েৰী প্ৰসাদ উপাধ্যায়, সম্পাদক পল্লৱ গোহাঁই আৰু আন্তঃৰাষ্ট্ৰীয় ৰেটেড দবাৰু অনুজ প্ৰতীম বৰুৱাই এই সন্মান লাভ কৰিছিল ৷

********