‘এইদেশ বঁটা’ ২০২৪ ৰ ঘোষণা : প্ৰয়াত ভৱেশ শইকীয়া স্মাৰক ‘এইদেশ’ শ্ৰেষ্ঠ সাংবাদিক বঁটা ২০২৪ বাবে বোকাখাতৰ জেষ্ঠ সাংবাদিক মহেশ আগ্ৰৱাল আৰু ‘এইদেশ’ যুৱ উদ্যমী বঁটা ২০২৪ ৰ বাবে কাজিৰঙাৰ বিশিষ্ট পক্ষী নিৰীক্ষক ৰফিকুল ইছলাম নিৰ্বাচিত :

Aiidesh News : 26 December - 2024 : 

২০১৭ চনতেই আৰম্ভ হোৱা অসমৰ অন্যতম অন লাইন সংবাদ প্ৰতিষ্ঠান ‘এইদেশ’ৰ উদ্যোগত বোকাখাতৰ জেষ্ঠ সাংবাদিক, অল আচাম প্ৰেছ ক'ৰেচপ'ণ্ডেন্ট ইউনিয়ন চমুকৈ ‘আপকু’ৰ আৰু বোকাখাত প্ৰেছ ক্লাবৰ প্ৰতিষ্ঠাপক সভাপতি প্ৰয়াত ভৱেশ শইকীয়াৰ সোঁৱৰণীত প্ৰদান কৰি অহা ‘এইদেশ বঁটা’ৰ ২০২৪  বৰ্ষৰ বাবে বঁটা প্ৰাপকৰ নাম আজি আনুষ্ঠানিক ভাৱে ঘোষণা কৰা হয় ৷ আজি বোকাখাতত অনুষ্ঠিত এক বৈঠকত বঁটাৰ বাবে নিয়োজিত কৰা ৭ জনীয়া নিৰ্বাচক মণ্ডলীয়ে এইদেশ সংবাদ গোষ্ঠীৰ ৰাজ্যিক পৰ্যায়ত ভৱেশ শইকীয়া স্মাৰক এইদেশ শ্ৰেষ্ঠ সাংবাদিক বঁটা ২০২৪ বাবে বোকাখাতৰ জেষ্ঠ সাংবাদিক তথা বোকাখাত প্ৰেছ ক্লাবৰ প্ৰতিষ্ঠাপক সম্পাদক, দৈনিক পূৰ্বোদয় কাকতৰ বোকাখাতৰ সাংবাদিক মহেশ আগ্ৰৱালক আৰু জিলা পৰ্যায়ৰ ভৱেশ শইকীয়া স্মাৰক শ্ৰেষ্ঠ যুৱ উদ্যমী বঁটা ২০২৪ বাবে কাজিৰঙা বচাগাওঁৰ বিশিষ্ট পৰিৱেশ কৰ্মী, দেশৰ আগশাৰীৰ পক্ষী নিৰীক্ষণকাৰী তথা ট্যুৰ অপাৰেটৰ ৰফিকুল ইছলামক নিৰ্বাচন কৰে ৷ জেষ্ঠ সাংবাদিক মহেশ আগ্ৰৱালে বিগত ৩৬ বছৰেই ধাৰাহাহিকভাৱে সংবাদ সেৱা কৰি অহাৰ লগতে হিন্দী সাহিত্যৰ প্ৰতিও অৱদান আগবঢ়াই আহিছে ৷ একেদৰে ৰফিকুল ইছলামে বিগত সময়ত পক্ষী নিৰীক্ষক হিচাবে দেশৰ ভিতৰতেই অন্যতম পক্ষী নিৰীক্ষক হিচাবে প্ৰতিষ্ঠা লাভ কৰিছে ৷ পক্ষী নিৰীক্ষণৰ উপৰিও পক্ষী আৰু পক্ষীৰ আৱাস সংৰক্ষণৰ বাবেও সজাগতাৰ সৃষ্টি কৰি আহিছে ৰফিকুল ইছলামে ৷

উল্লেখ্য যে অহা ১৬ জানুৱাৰীত বোকাখাতত আয়োজিত প্ৰয়াত ভৱেশ শইকীয়াৰ ৯৬ সংখ্যক জন্মদিৱস আৰু স্মৃতিচাৰন সভাত এইদেশ সংবাদৰ গোষ্ঠীৰ এই  দুই বঁটা আনুষ্ঠানিকভাৱে প্ৰদান কৰা হ'ব ৷ এই বঁটাত ভৱেশ শইকীয়াৰ স্মাৰক, নগদ ধন আৰু প্ৰশস্তিপত্ৰ থাকিব বুলি এইদেশ সংবাদৰ তৰফৰ পৰা জনায় ৷

**********