কাজিৰঙাৰ বন্যপ্ৰাণী পুনৰসংস্থাপন আৰু সংৰক্ষণ কেন্দ্ৰৰ ২৩ সংখ্যক বৰ্ষপূৰ্তি : বিভাগীয় অনুমতিৰে ৯৫০০ ৰো অধিক বন্যপ্ৰাণী উদ্ধাৰ আৰু বনাঞ্চলত পুনৰ সংস্থাপন :

Aiidesh News  : 29 August - 2025  : 

বোকাখাত সম জিলাৰ বৰজুৰিত থকা বন্যপ্ৰাণী উদ্ধাৰ আৰু চিকিৎসা সেৱাৰ কেন্দ্ৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰই বন্যপ্ৰাণী উদ্ধাৰ, পুনৰসংস্থাপন আৰু সংস্থাপন ক্ষেত্ৰত  ভাৰতৰ ভিতৰতেই প্ৰথমটো অনুষ্ঠান হিচাবে সফলতাৰ ২৩ টা বছৰৰ সম্পুৰ্ণ কৰিছে ৷ ২০০২ চনত প্ৰতিষ্ঠা লাভ কৰা এই কেন্দ্ৰই ২৮ আগষ্টত ইয়াৰ ২৩ সংখ্যক বৰ্ষপুৰ্তি সম্পুৰ্ণ কৰিলে ৷ এই সুদীৰ্ঘ সময়চোৱাত বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰই ৯৫০০ ৰো অধিক বন্যপ্ৰাণী বিধিগত ভাৱে উদ্ধাৰ কৰি বনাঞ্চলত পুনৰ সফলতাৰে মুকলি কৰিছে ৷ 

কাজিৰঙাত হোৱা বানপানীৰ সময়ত চোৱাত তাৎক্ষনিক ভাৱে সঁহাৰি জনাবলৈ প্ৰতিষ্ঠা হোৱা এই বন্যপ্ৰাণী পুনৰ সংস্থাপন আৰু সংৰক্ষন কেন্দ্ৰই প্ৰতিটো বাৰিষাৰ বানপানীৰ সময়ত সহস্ৰাধিক বানাৰ্ত আৰু আঘাত প্ৰাপ্ত বন্যপ্ৰাণীক উদ্ধাৰ কৰি বনাঞ্চলত পুনৰ সংস্থাপন কৰি আহিছে । কাজিৰঙা ৰাষ্ট্ৰীয় উদ্যানৰ পানবাৰী সংৰক্ষিত বনাঞ্চলৰ গাতে বৰজুৰি নামৰ ঠাইত অৱস্থিত এই কেন্দ্ৰটো অসমৰ বন বিভাগ, ভাৰতীয় বন্যপ্ৰাণী ন্যাস আৰু পশু কল্যাণৰ  আন্তৰ্জাতিক পুঁজিৰ দ্বাৰা যুটীয়াভাৱে পৰিচালিত ৷ গঁড় আৰু হাতীৰ পোৱালীৰ পৰা আৰম্ভ কৰি গোধা নাহৰফুটুকী বাঘ আৰু খটিয়া ৩৫৭ টা বিৰল আৰু অনুসুচীত বন্যপ্ৰানীক চিকিৎসা আৰু পুনৰসংস্থাপন দিব পৰাকৈ সুবিধাৰে সমৃদ্ধ এই বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰটো সমগ্ৰ ভাৰতৰ ভিতৰতে অন্যতম ৷ ১৯৭২ চনৰ বন্যপ্ৰাণী প্ৰতিৰক্ষা আইনৰ অনুসুচীত বন্যপ্ৰাণীৰ উদ্ধাৰ আৰু চিকিৎসাৰ বাবে থাকিব লগা বিধিগত ব্যৱস্থাৱলী, কেন্দ্ৰীয় চিৰিয়াখানা প্ৰাধিকৰণ আৰু কেন্দ্ৰীয় চৰকাৰৰ বিশেষ অনুজ্ঞা পত্ৰৰে কেন্দ্ৰটোৰ বিশেষজ্ঞ আৰু স্বেচ্ছাসেৱকৰ দলে প্ৰতি বছৰেই বানপানীৰ সময়ত ৭০০ ৰো অধিক বন্যপ্ৰাণী উদ্ধাৰ কৰি আহিছে ৷ 

কেন্দ্ৰটোৰ আছে জৰুৰীকালীন চিকিৎসা আৰু উদ্ধাৰ গোটেৰে সৈতে একাধিক ভ্ৰাম্যমাণ পশু চিকিৎসা গোট ৷ কাজিৰঙাৰ বানাৰ্ত বন্যপ্ৰাণীৰ সেৱাৰ বাবে প্ৰথমাৱস্থাত প্ৰতিষ্ঠা হোৱা বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰই সম্প্ৰতি সমগ্ৰ অসমৰ ইপৰিও কাষৰীয় ৰাজ্যতো বন্যপ্ৰাণীৰ উদ্ধাৰ আৰু পুনৰ সংস্থাপনৰ বিশেষ সেৱা আগবঢ়াই আহিছে ৷ বানাৰ্ত বন্যপ্ৰাণীৰ উদ্ধাৰ আৰু চিকিৎসা সেৱা আৰু পুনৰ সংস্থাপনৰ উপৰিও কেন্দ্ৰটোয়ে বিগত সময়চোৱাত মানাহ ৰাষ্ট্ৰীয় উদ্যানত কাজিৰঙাৰ পৰা নিয়া গঁড়ৰ পুনৰ সংস্থাপন কৰা আৰু দুস্প্ৰাপ্য হলৌ বান্দৰক সুৰক্ষিত আৱাস স্থানত পুনৰ সংস্থাপন কৰাৰ দৰে সফল, গুৰুত্বপূৰ্ণ আৰু অভিনৱ সংৰক্ষণ অভিযানো সম্পুৰ্ণ কৰিছে । বন্যপ্ৰাণী পুনৰ সংস্থাপন আৰু সংৰক্ষন কেন্দ্ৰৰ  দক্ষ বিশেষজ্ঞ আৰু বন্যপ্ৰাণীৰ প্ৰতি পালকৰ দলে  অনাথ বনৰীয়া হাতী গঁড় , বনৰীয়া ম'হ, ভালুক , নাহৰফুটুকী, গোধাফুটুকী, চেৰ’, বিভিন্ন প্ৰজাতিৰ সৰীসৃপ, চৰাই, বান্দৰ আৰু একাধিক হাড়গিলা চৰাইৰ চিকিৎসা প্ৰদান কৰি বনাঞ্চলত সফলতাৰে মুকলি কৰিছে ৷

প্ৰতি বছৰে কাজিৰঙা ৰাষ্ট্ৰীয় উদ্যানত হোৱা বানপানীৰ সময়ত বন্যপ্ৰাণী আৰু চৌপাষৰ জনবসতিও সমস্যাৰ সন্মুখীন হয় ৷ এনে বোৰ সংকটৰ সময়ত, কেন্দ্ৰটোয়ে উদ্ধাৰকাৰী দল, চাৰিটা বিশেষজ্ঞৰ গোট আৰু অস্থায়ী শিবিৰ স্থাপন কৰি বন্যপ্ৰাণীৰ সেৱা আৰু জনসাধাৰণক সহায় কৰিব পৰাকৈ ৩০ / ৪০ গৰাকী অভিজ্ঞ পশু চিকিৎসক, ক্ষেত্ৰ সহায়ক আৰু স্বেচ্ছাসেৱক নিয়োজিত কৰে । বিভিন্ন সময়ত কেন্দ্ৰৰ ভ্ৰাম্যমান  বন্যপ্ৰাণী সেৱাৰ গোটবোৰে বিভিন্ন প্ৰান্তৰৰ দুৰ্গত বন্যপ্ৰাণীৰ উদ্ধাৰ অভিযান চলাই অহাৰ লগতে মানুহ আৰু বন্যপ্ৰাণীৰ সংঘাত নিয়ন্ত্ৰন কৰিবলৈ কাৰ্য আঁচনিও হাতত লৈ আহিছে ৷ স্থানীয় লোকৰ নেতৃত্বত বন্যপ্ৰাণী সংৰক্ষণ প্ৰচেষ্টাকো তাৎক্ষনিকভাৱে সহায় কৰিছে বন্যপ্ৰাণী পুনৰ সংস্থাপন আৰু সংৰক্ষন কেন্দ্ৰই ৷ সফলতাৰ ২৩ টা বছৰ অতিক্ৰম কৰি কেন্দ্ৰীয় আৰু ৰাজ্য চৰকাৰৰ স্বীকৃত অনুষ্ঠান হিচাবে কাজিৰঙাৰ বন্যপ্ৰাণী পুনৰ সংস্থাপন আৰু সংৰক্ষন কেন্দ্ৰটো দেশৰ অন্যতম হিচাবে পৰিগনিত হৈছে ৷

***********