কাজিৰঙা ৰাষ্ট্ৰীয় উদ্যানত পাঁচ ঘন্টীয়া শ্বাসৰূদ্ধ অভিযানৰ শেষত অব্যৱহৃত এটা কেঁচা কুঁৱাত আৱদ্ধ বনৰীয়া হাতীক উদ্ধাৰ :

Aiidesh News : 21 August -2025  : 

কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলৰ বুঢ়াপাহাৰ বনাঞ্চলত পুৰনি আৰু অৱ্যহৃত এটা কুঁৱাত আৱদ্ধ এটা হাতীক স্থানীয় লোকৰ সহযোগত আজি উদ্ধাৰ কৰে ৰাষ্ট্ৰীয় উদ্যানখনৰ উদ্ধাৰকাৰী দলে ৷ ৰাষ্ট্ৰীয় উদ্যানখনৰ বুঢ়াপাহাৰ বনাঞ্চলৰ দেওচূড় অঞ্চলৰ পাহাৰৰ নামনিৰ এটা পুৰনি আৰু অব্যহৃত কেঁচা কুঁৱাত পিচৰ ঠেং সোমাই আজি পুৱতি নিশা এটা বনৰীয়া হাতী আৱদ্ধ হৈ পৰে ৷ পুৱা ৬ বজাত বোকাত আৱদ্ধ হাতীটোৰ বিষয়ে বুঢ়াপাহাৰ বনাঞ্চলৰ বনাঞ্চলিক বিষয়াক অৱগত কৰে স্থানীয় লোকে ৷ খবৰ পাই বনাঞ্চলিক বিষয়া নিলয় বৰুৱা আৰু বিভাগীয় পশু চিকিৎসক ডা৹ সৌৰভ বুুৰাগোহাঁঞৰ নেতৃত্বত উদ্ধাৰকাৰী বনকৰ্মীৰ এটা দল ঘটনাস্থলীত উপস্থিত হৈ হাতীটোক উদ্ধাৰৰ বাবে অভিযান আৰম্ভ কৰে ৷ জে চি বিৰ সহায়ত পথ উলিয়াই ঘটনাস্থলীত উপস্থিত হৈ স্থানীয় লোকৰ সহযোগত অভিযানকাৰী দলে প্ৰায় ৫ ঘন্টা জুৰি চলোৱা উদ্ধাৰ অভিযানৰ শেষত কুঁৱাটোৰ বোকাৰ পৰা হাতীটো উদ্ধাৰ কৰি বনাঞ্চললৈ পঠাবলৈ সক্ষম হয় ৷ কেঁচা অব্যৱহৃত কুঁৱাত আৱদ্ধ হাতীটোৰ শৰীৰত কোনোধৰণ আঘাতৰ চিন নাই যদিও ৫ ঘন্টা জোৰা উদ্ধাৰ অভিযানৰ সময়ত কিছু পৰিমানে মানসিক উত্তেজনা আৰু চাপত আছিল হাতীটো ৷ উদ্ধাৰৰ পিচক বনাঞ্চলত প্ৰৱেশ কৰা হাতীটোক সম্প্ৰতি নিৰীক্ষণত ৰখা হ’ব বুলি জানিবলৈ দিয়ে বনাঞ্চলিক বিষয়া নিলয় বৰুৱাই ৷

**********