কাজিৰঙাৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰত প্ৰতিপালিত আৰু মাতৃৰ পৰা বিচ্ছেদিত দুটা ভালুক পোৱালীক দিহিং পাটকাইত পুনৰ সংস্থাপনৰ চেষ্টা বন বিভাগৰ :

Aiidesh News : 20 August - 2025  :

যোৰহাটৰ ডিচৈ সংৰক্ষিত বনাঞ্চলৰ পৰা ছমাহৰ আগতে উদ্ধাৰ কৰি অনা দুটা অনাথ এচিয়া প্ৰজাতিৰ ক'লা ভালুক (উৰ্চাছ থিবেটেনাছ) পোৱালীক ১৬ আগষ্টৰ দিনা বোকাখাত সম জিলাৰ বৰজুৰিত থকা বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰৰ পৰা উজনি অসমৰ দিহিং পাটকাই ৰাষ্ট্ৰীয় উদ্যানত পুনৰ সংস্থাপনৰ বাবে লৈ যোৱা হয় ৷ সম্প্ৰতি দিহিং পাটকাই ৰাষ্ট্ৰীয় উদ্যানত এই ভালুক পোৱালী দুটাক ডিচেম্বৰ মাহলৈকে বিশেষভাৱে নিৰ্মিত আৰু বনাঞ্চলত সংস্থাপিত গড়ালত ৰখা হৈছে  ৷ এই সময়চোৱাত ভালুকৰ পোৱালী কেইটাক দিহিং পাটকাইৰ পৰিৱেশ আৰু বন্যতাৰ সৈতে চিনাকী কৰাৰ বাবে পদ্ধতিগত ব্যৱস্থা গ্ৰহন কৰিব বিশেষজ্ঞৰ দলে ৷ এই সমুহ পৰ্যবেক্ষন সফলভাৱে ৰূপায়িত হলে অহা ডিচেম্বৰ মাহত ভালুকৰ পোৱালী দুটাক দিহিং পাটকাই ৰাষ্ট্ৰীয় উদ্যানৰ বনাঞ্চলত মুকলি কৰা হ’ব বুলি জানিবলৈ দিয়ে কাজিৰঙাৰ ক্ষেত্ৰ সঞ্চালক ড৹ সোনালী ঘোষে ৷

যোৱা ফেব্ৰুৱাৰী মাহত জন্মৰ চাৰিৰ পৰা ছয় সপ্তাহ হোৱা এই মাতৃৰ বিহীন ভালুক পোৱালী দুটাক ডিচৈ বনাঞ্চলৰ পৰা উদ্ধাৰ কৰি এজন স্থানীয় যুৱকে যোৰহাট বন সংমণ্ডলৰ ন-কছাৰী খণ্ড বন কাৰ্যালয়ক অৰ্পন কৰিছিল । উদ্ধাৰৰ পিচত পোৱালী দুটাৰ মাকৰ সন্ধানত বনকৰ্মীৰ দলে ডিচৈ বনাঞ্চলৰ উদ্ধাৰস্থলীত চলোৱা অভিযানত মাক ভালুকজনীৰ কোনো সন্ধান নোপোৱাৰ বাবে যোৰহাট বনসংমণ্ডলে পোৱালী কেইটা বিশেষ যত্নৰ বাবে কাজিৰঙাৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰলৈ প্ৰেৰণ কৰিছিল আৰু তেতিয়াৰে পৰাই বৰজুৰিৰ বন্যপ্ৰানী পুনৰ সংস্থাপন আৰু সংৰক্ষণ কেন্দ্ৰত ভালুক পোৱালী দুটাক প্ৰতিপালন কৰি ডাঙৰ কৰা হৈছিল ৷ 

বন্যপ্ৰাণী পুনৰসংস্থাপন আৰু সংৰক্ষণ কেন্দ্ৰত ফেব্ৰুৱাৰী মাহৰে পৰা কেন্দ্ৰটোৰ পৰিচালক তথা জেষ্ঠ পশু চিকিৎসক ডা৹ ভাস্কৰ চৌধুৰী আৰু তেওঁৰ দলৰ তত্বাৱধানত ভালুক পোৱালী দুটাৰ প্ৰতিপালন আৰু চিকিৎসা কৰা হৈছিল ৷ এই সময়চোৱাত ভালুকৰ পোৱালী কেইটাৰ প্ৰতিপালনৰ বাবে অৰুণাচলৰ পাকেই ব্যাঘ্ৰ সংৰক্ষিত বনাঞ্চলত থকা অনাথ এছিয়া প্ৰজাতিৰ ক'লা ভালুক পুনৰসংস্থাপন কেন্দ্ৰই প্ৰস্তুত কৰি উলিওৱা এছিয়া প্ৰজাতিৰ ক'লা ভালুক পুনৰসংস্থাপন আচৰণ বিধি বা প্ৰট’কল অনুসৰণ কৰা হৈছিল আৰু বন্য পৰিৱেশত জীয়াই থাকিব পৰাকৈ প্ৰস্তুত কৰি বনৰ পৰিস্থিতিৰ সৈতে পৰিচয় কৰাই দিয়াৰ বাবে চেষ্টা কৰা হৈছিল যাতে পুনৰ সংস্থাপনৰ পিচত ভালুক পোৱালী কেইটাই বনাঞ্চলত জীয়াই থকিব পাৰে । এই সমগ্ৰ প্ৰক্ৰিয়াত সুক্ষ্মভাৱে নিৰীক্ষণ কৰি পোৱালী কেইটাৰ ওপৰত মানুহৰ প্ৰভাৱ নোহোৱা কৰিবলৈ চেষ্টা চলাইছিল বন্যপ্ৰাণী পুনৰসংস্থাপন আৰু সংৰক্ষণ কেন্দ্ৰৰ অভিজ্ঞ পশু চিকিৎসক আৰু কেয়াৰতেকাৰ সকলে ৷

বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰত আন্ত:ৰাষ্ট্ৰীয় প্ৰট’কল অনুসৰণ কৰি প্ৰতিপালন কৰা ভালুকৰ পোৱালী দুটাক পুনৰ ডিচৈ সংৰক্ষিত বনাঞ্চলতে পুনৰসংস্থাপন কৰাৰ কথা চিন্তা কৰা হৈছিল যদিও ডিচৈ বনাঞ্চলৰ কাষতে থকা মানুহৰ ঘন বসতিয়ে ভালুক পোৱালী কেইটাক বিপদত পেলোৱাৰ উপৰিও জটিল প্ৰত্যহ্বানৰ সৃষ্টি কৰিব পৰা সম্ভাৱনীয়তাৰ প্ৰতি লক্ষ্য কৰি এই সিধান্ত বাতিল কৰিছিল ৷ পৰৱৰ্তী সময়ত ভালুক পোৱালী কেইটাক পুনৰ সংস্থাপনৰ বাবে প্ৰাকৃতিক আৱৰণ, জন বসতিৰ পৰা থকা দূৰত্ব, চিকাৰৰ উপলব্ধতা, আৰু স্থানীয় জনসাধাৰণৰ সংৰক্ষণ সজাগতাৰ ওপৰত অধ্যয়ন কৰি উজনি অসমৰ দিহিং পাটকাই ৰাষ্ট্ৰীয় উদ্যানক ভালুক কেইটাৰ পুনৰ সংস্থাপনৰ  বাবে আটাইতকৈ উপযুক্ত স্থান হিচাপে চিনাক্ত কৰি পোৱালী কেইটাক দিহিং পাটকাই ৰাষ্ট্ৰীয় উদ্যানতে পুনৰ সংস্থাপন কৰাৰ বাবে বন বিভাগক অৱগত কৰিছিল বিশেষজ্ঞৰ দলে । 

২০২৫ চনৰ ৪ জুনত বনবিভাগৰ বন্যপ্ৰাণী শাখাৰ প্ৰধান মুখ্য বন সংৰক্ষক আৰু অসমৰ মুখ্য বন্যপ্ৰাণী ৱাৰ্ডেনে দিহিং পাটকাই ৰাষ্ট্ৰীয় উদ্যানত এই ভালুক পোৱালী কেইটাৰ পুনৰ সংস্থাপনৰ বাবে অনুমতি প্ৰদান কৰে ৷ বিভাগীয় অনুমতি লাভ কৰাৰ পিচত যোৱা ১৬ আগষ্টত বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰৰ জেষ্ঠ পশু চ্কিৎসক ডা৹ ভাস্কৰ চৌধুৰীৰ নেতৃত্বত বিশেষজ্ঞৰ দলে ভালুকৰ পোৱালী দুটাক দিহিং পাটকাই ৰাষ্ট্ৰীয় উদ্যানৰ বনাঞ্চলত সংস্থাপিত কৰে ৷ সম্প্ৰতি বনাঞ্চলৰ পৰিৱেশৰ লগত নিজকে সংস্থাপিত কৰিবলৈ লৈছে পোৱালী কেইটাই ৷ মানুহৰ হাতত প্ৰতিপালিত হৈ পুনৰ বনাঞ্চলত ভালুক সংস্থাপনৰ এই অভিযানৰ সফলতাই অসমৰ বন্যপ্ৰাণী সংৰক্ষণৰ প্ৰচেষ্টাক অন্যএক মাত্ৰা প্ৰদান কৰিছে ৷ অসমত এচিয়া প্ৰজাতিৰ ভালুক সংৰক্ষণৰ এই  প্ৰচেষ্টা অন্যতম হিচাবে পৰিগনিত হৈছে ৷