হাওৰাঘাটত নৈৰ বুকুত যুৱকৰ মৃতদেহ উদ্ধাৰ

 হাওৰাঘাট নগৰৰ গাতে লাগি থকা হাতিপাৰাত বৃহস্পতিবাৰে নদীৰ কোঁৱাল সোঁতে উটুৱাই নিয়া এগৰাকী যুৱকৰ মৃতদেহ আজি দুপৰীয়াৰ ভাগত উদ্ধাৰ হয় ৷ ঘটনাৰ বিৱৰণী অনুসৰি পশ্চিম কাৰবি আংলং জিলাৰ তৰাডুবি নিবাসী ৰাজেন ডেকাৰজাৰ একমাত্ৰ পুত্ৰ অভিনব ডেকাৰজা (১৮) কিছুদিন পূৰ্বে হাওৰাঘাট হাতীপাৰাত থকা পেহায়েকৰ ঘৰত ফুৰিবলৈ আহিছিল ৷ এইবাৰ উচ্চতৰ মাধ্যমিকৰ চূড়ান্ত বৰ্ষত অৱতীৰ্ণ হোৱা অভিনৱে পেহায়েকৰ ঘৰৰ পৰা কালি ১০/১২ জন লগৰীয়াৰ সৈতে এৰা দীঘলপানী নৈত গা ধুবলৈ গৈছিল ৷ এনে সময়তে নদীত গা ধুই থকা অৱস্থাত নদীৰ কোঁৱাল সোঁতে যুৱক জনক অকষ্মাতে উটুৱাই লৈ যায় ৷

ঘটনাটোক লৈ এলেকাটোত হুৱা- দুৱা লাগে যদিও কালিৰে পৰা যুৱকজনক উদ্ধাৰ কৰিব পৰা নগ’ল ৷ আজি পুৱাৰে পৰা এছ ডি আৰ এফৰ জোৱানে নিৰন্তৰ অভিযান চলাই পুৱা প্ৰায় ১১-৩০ মান বজাত কালি ঘটনা সংঘটিত হোৱা স্থানৰ পৰা ৫০০ মিটাৰ নিলগৰ নদীৰ কাষৰ কলমৌ গছত লাগি থকা অৱস্থাত অভিনৱৰ নিথৰ দেহ উদ্ধাৰ কৰিবলৈ সক্ষম হয় ৷ ইফালে যুৱকজনৰ বাঢ়নী পানীৰ সোঁতত সলিল সমাধি ঘটা একমাত্ৰ পুত্ৰৰ মৃত্যুৰ খবৰ পাই শোকত ভাগি পৰিছে যুৱক গৰাকীৰ দূৰ্ভগীয়া পিতৃ- মাতৃ৷ সহজ- সৰল স্বভাৱৰ অভিনৱ ডেকাৰজা তিৱা ছাত্ৰ সন্থাৰ ৰংখাং আঞ্চলিকৰ সহকাৰী সম্পাদকৰ দায়িত্বত আছিল বুলি জানিব পৰা গৈছে ৷কৰ’নাতংকৰ মাজতে এনে শোকাৱহ ঘটনাই দুয়োখন জিলাতে শোঁকৰ ছা পেলাইছে ৷