কাজিৰঙা ৰাষ্ট্ৰীয় উদ্যানত দুৰ্যোগ ব্যৱস্থাপনাৰ কাৰ্য আঁচনি প্ৰস্তুতৰ বাবে গুৰুত্বপূৰ্ণ কৰ্মশালা :

Aiidesh News  : 18 January - 2025 :

কাজিৰঙাত দুৰ্যোগ নিয়ন্ত্ৰন, দুৰ্যোগৰ সময়ত বন্যপ্ৰাণী আৰু জৈৱ বৈচিত্ৰ সংৰক্ষণৰ বাবে কাৰ্য ক্ৰমনিকা আৰু আঁচনি প্ৰস্তুতৰ বাবে আজি এক গুৰুত্বপূৰ্ণ কৰ্মশালা কাজিৰঙাৰ কঁহৰাত অনুষ্ঠিত হয় ৷ কাজিৰঙা ৰাষ্ট্ৰীয় উদ্যান কৰ্তৃপক্ষৰ উদ্যোগত দেশৰ আগশাৰীৰ প্ৰকৃতি সংগঠন ৱাইল্ড লাইফ ট্ৰাষ্ট অৱ ইণ্ডিয়াৰ বিশেষ সহযোগত কঁহৰাৰ মহী মিৰি প্ৰক্ষাগৃত অনুষ্ঠিত এই কৰ্মশালাত কাজিৰঙাৰ সঞ্চালক ড৹ সোনালী ঘোষে সকলোকে কাজিৰঙালৈ আদৰণী জনোৱাৰ লগতে দুৰ্যোগৰ সময়ত কাজিৰঙাৰ জৈৱ বৈচিত্ৰ আৰু বন্যপ্ৰাণী সংৰক্ষণৰ বাবে বিজ্ঞান সন্মত এক আঁচনি যুগোটাবৰ বাবে কৰ্মশালাত অংশগ্ৰহন কৰা বিশেষজ্ঞ সকলক অনুৰোধ জনায় ৷ কৰ্মশালাত বন বিষয়াৰ উপৰিও বিভিন্ন বেচৰকাৰী সংগঠনৰ প্ৰতিনিধি, জল সম্পদ আৰু দুৰ্যোগ প্ৰশমন বিভাগৰ বিষায়াও অংশগ্ৰহন কৰে ৷ কৰ্মশালাত কাজিৰঙাত দুৰ্যোগ ব্যৱস্থাপনা আৰু সহনশীল উন্নয়ন প্ৰসংগত ড৹ তৌচিফ জামানে, কাজিৰঙাৰ দুৰ্যোগ প্ৰসমনৰ কৰ্ম আঁচনি প্ৰস্তুতৰ বাবে হ'ব পৰা দুৰ্যোগৰ শংকাৰ বিষয়ত ভাৰ্গৱ আনন্দধৰাই, কাজিৰঙাৰ বাবে দুৰ্যোগ ব্যৱস্থাপনাৰ আঁচনিৰ বাবে প্ৰয়োজনীয় পৰামৰ্শ শীৰ্ষত দুৰ্যোগ প্ৰশমন বিভাগৰ হৈ ৰণি ৰাজকুমাৰ, প্ৰাঞ্জল শইকীয়া, পাৰ্থ প্ৰতীম শৰ্মা, ভাৰ্গৱ বৰুৱা আৰু মানস জ্যোতি বৰুৱাই প্ৰয়োজনীয় পৰামৰ্শৰ ওপৰত আলোচনা আগবঢ়ায় ৷ পৰৱৰ্তী সময়ত ৱাইল্ড লাইফ ট্ৰাষ্ট অৱ ইণ্ডিয়াৰ জেষ্ঠ পশুচিকিৎসক ডা৹ ভাস্কৰ চৌধুৰী আৰু বিভাগীয় পশুচিকিৎসক ডা৹ বিশ্বজিত বৰুৱাই সংক্ৰমক ৰোগৰ ক্ৰমবৰ্ধক শংকাৰ বিষয়ত আলোচনা কৰাৰ বিপৰীতে জলবায়ু পৰিবৰ্তন বিষয়ত ড৹ নিৰ্মালী গগৈ আৰু বিশ্ব প্ৰকৃতি নিধিৰ জেষ্ঠ সমন্বয়ক ড৹ অমৃত শৰ্মাই বিভিন্ন পৰামৰ্শ প্ৰদান কৰে ৷ পিচত বিশ্ব ঐতিয্য ক্ষেত্ৰ কাজিৰঙাত দুৰ্যোগ প্ৰসমনৰ প্ৰয়োজনীয়তা ৰ সম্পৰ্কত উত্তম শইকীয়া আৰু পাৰ্চী ফাৰুকে আলোচনা আগবঢ়োৰ পিচত ড৹ অভিনন্দন শইকীয়াই কাজিৰঙাৰ কায়ৰীয় জনসাধাৰণৰ বাবে দুৰ্যোগ প্ৰশমনৰ সম্পৰ্কত পৰামৰ্শ আগবঢ়ায় ৷ কাজিৰঙাৰ বাবে  অতি গুৰুত্বপূৰ্ণ বুলি বিবেচিত আজিৰ এই কৰ্মশালত পুব অসম বন্যপ্ৰাণী সংমণ্ডলৰ ডি এফ অ’ অৰুণ বিঘ্নেশেও অংশ গ্ৰহন কৰে ৷ আজিৰ কৰ্মশালাতে কাজিৰঙাৰ বাবে দুৰ্যোগ প্ৰশমন আঁচনি প্ৰস্তুত কৰাৰ বাবে অসম চৰকালৈ প্ৰস্তাৱ প্ৰেৰণৰো সিধান্ত গ্ৰহন কৰে ৷

************