কাজিৰঙা ৰাষ্ট্ৰীয় উদ্যানত মাতৃহাৰা এমহীয়া গঁড় পোৱালী উদ্ধাৰ :

কাজিৰঙা ৰাষ্ট্ৰীয় উদ্যানৰ বান্দৰডুবি এলেকাৰ সোমবাৰে বিয়লি এটা এমহীয়া মাতৃহাৰা গঁড় পোৱালীক বন কৰ্মীয়ে উদ্ধাৰ কৰে ৷ ৰাষ্ট্ৰীয় উদ্যানখনৰ পশ্চিম বান্দৰজুবি বন শিৱিৰৰ বনকৰ্মীয়ে ৩৭ নং ৰাষ্ট্ৰীয় পথৰ সমীপত বনাঞ্চল এলেকাত এমহীয়া এই মতা গঁড় পোৱালীটো অকলশৰীয়াকৈ বিচৰন কৰি ফুৰা প্ৰত্যক্ষ কৰে ৷ বহু বিচাৰিও অঞ্চলটোত পোৱালীটোৰ মাকৰ উপস্থিতিৰ কোনো উমান নাপাই বনকৰ্মী সকলে উৰ্ধতন কৰ্তৃপক্ষক অৱগত কৰে ৷ বাগৰি বনাঞ্চলৰ বনাঞ্চলিক বিষয়া পঙ্কজ বৰা ঘটনাস্থলীত উপস্থিত হৈ গঁড় পোৱালীটোৰ মাকৰ সন্ধানত অভিযান আৰম্ভ কৰে ৷ সমগ্ৰ অঞ্চলত অভিযান চলায় গঁড় পোৱালীটোৰ মাকৰ কোনো সম্ভেদ নাপাই বনাঞ্চলিক বিষয়া জনে কাজিৰঙাৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰক ঘটনাটো অৱগত কৰে ৷ কেন্দ্ৰটোৰ পশু চিকিৎসক ডা৹ পানজিত বসুমতাৰীৰ নেতৃত্ব বনকৰ্মী আৰু কেন্দ্ৰৰ উদ্ধাৰকাৰী দলে ঘটনাস্থলীৰ পৰা গঁড় পোৱালীটো উদ্ধাৰ কৰি কেন্দ্ৰটোলৈ আনে ৷ উদ্ধাৰৰ সময়ত এমহীয়া গঁড় পোৱালীটো দীৰ্ঘ সময় ধৰি মাকৰ পৰা আঁতৰি থকাৰ বাবে যথেষ্ট পৰিমানে চাপ আৰু সমস্যাৰ সন্মুখীন হৈছিল ৷ মাকৰ কোনো সম্ভেদ নাপায় পোৱালীটোৰ স্বাস্থ্যৰ প্ৰতি লক্ষ্য ৰাখি পোৱালীটোক বিশেষ যত্নৰ বাবে কেন্দ্ৰলৈ লৈ আন উদ্ধাৰকাৰী দলে৷ সম্প্ৰতি গঁড় পোৱালীটোক কেন্দ্ৰতে প্ৰতিপালন কৰাৰ বিপৰীতে ঘটনাস্থলীত মাকৰ সন্ধানো অব্যাহত ৰাখিছে বনকৰ্মী সকলে ৷ মাকৰ সন্ধান পালে পোৱালীটোক পুনৰ মাকৰ লগত দিয়া বৃহব বুলিও জনায় ডা৹ পানজিত বসুমতাৰীয়ে ৷