পৰ্যটন বৰ্ষৰ শেষত বিগত দহ বছৰৰ অভিলেখ ভংগ কৰি চলিত পৰ্যটন বৰ্ষত কাজিৰঙালৈ আহিল ৪২ লাখৰো অধিক দেশী বিদেশী পৰ্যটক : ১০. ৯০ কোটি টকাৰ ৰাজহ সংগ্ৰহ :

Aiidesh News  : 2 April - 2025  :

পূৰ্বৰ সকলো অভিলেখ ভঙ্গ কৰি কাজিৰঙালৈ চলিত বৰ্ষত সৰ্বাধিক পৰ্যটকৰ আগমন হৈয়ে ৷ ২০২৪ - ২৫ পৰ্যটন বৰ্ষত কাজিৰঙালৈ মুঠ ৪০,৫,০০৩ গৰাকী দেশীয় আৰু ১৭,২৯৮ বিদেশীক লৈ সৰ্বমুঠ  ৪২,২,৩০১ গৰাকী পৰ্যটকৰ আগমন হয় ৷ ইয়াৰ পৰা কাজিৰঙাই লাভ কৰে ১০ কোটি ৮৪ লাখ ৩৯ হেজাৰ ৯৯৯ টকাৰ ৰাজহ ৷ উলেখ্য যে ইয়াৰ বিপৰীতে ২০২৩ ২৪ পৰ্যটন বৰ্ষত কাজিৰঙালৈ আহিছিল মুঠ ৪২,২,৩০১ গৰাকী পৰ্যটক ৷ ইয়াৰে ৩২,৭,৪৯৩ গৰাকী দেশীয় আৰু ১৩,৯১৯ গৰাকী বিদেশী পৰ্যটক আছিল আৰু কাজিৰঙাই সংগ্ৰহ কৰিছিল ৮ কোটি ৮১ লাখ ৮৪ হেজাৰ ১৬১ টকা ৷ যাৰ পটভুমিত বিগত পৰ্যটন বৰ্ষক তুলনাত কাজিৰঙালৈ অহা পৰ্যটকৰ সংখ্যা ৮০,৮৮৯ গৰাকীলৈ বৃদ্ধি পাইছে আৰু ৰাজহো ২,০২,৫৫,৮৩৮ টকালৈ বৃদ্ধি পাইছে ৷ এই পৰিসংখ্যাই ৰাষ্ট্ৰীয় উদ্যান খনৰ পুৰ্বৰ ১০ টা পৰ্যটন বৰ্ষৰ পৰিসংখ্যাৰ ৰেকৰ্ড ভঙ্গ কৰিছে বুলি আজি বোকাখাতত থকা সঞ্চালকৰ কাৰ্যালয়ে জানিবলৈ দিছে ৷

মনকৰিব লগীয়া যে বিগত সময়ত ভাৰতৰ ৰাষ্ট্ৰপতি কোবিন্দ আৰু দ্ৰুপদী মুৰমুৰ পিচত যোৱা দুটা বছৰত কাজিৰঙা ৰাষ্ট্ৰীয় উদ্যানলৈ অহা দেশী বিদেশী পৰ্যটকৰ উপৰিও ভূটানৰ ৰজা জিগমে খেছাৰ নামগাইল ৱাংচুকক আৰু ২০২৪ চনৰ ৯ মাৰ্চত প্ৰধানমন্ত্ৰী নৰেন্দ্ৰ মোডীয়ে কাজিৰঙা ভ্ৰমণ কৰিছিল ৷  ১৯৭৪ চনত ৰাষ্ট্ৰীয় উদ্যানলৈ উন্নীত হোৱাৰ পিছত কাজিৰঙালৈ অহা প্ৰথমজন প্ৰধানমন্ত্ৰী আছিল নৰেন্দ্ৰ মোডী ৷ ইয়াৰ উপৰিও শেহতীয়াকৈ, দেশৰ বৈদেশিক পৰিক্ৰমা মন্ত্ৰী ড০ এছ জয়শংকৰে বিভিন্ন ৰাষ্ট্ৰৰ ৫৭ গৰাকী মিছন মুৰব্বীৰ সৈতে চলিত বৰ্ষৰ ২৪ ফেব্ৰুৱাৰীত এডভাণ্টেজ অসমৰ অংশ হিচাপে উদ্যানখন পৰিদৰ্শন কৰিছিল ৷

শেষতীয়াকৈ কাজিৰঙা ৰাষ্ট্ৰীয় উদ্যানে পৰিৱেশ-অনুকূল পৰ্যটনৰ উপৰত গুৰুত্ব প্ৰদান কৰি পৰ্যটন ক্ষেত্ৰত কাষৰীয় জনসাধাৰণকো জড়িত কৰাৰ চেষ্টা কৰিছে ৷ ৰাষ্ট্ৰীয় উদ্যান খনৰ বোকাখাতত থকা পূৱ অসম বন্যপ্ৰাণী সংমণ্ডল,  বিশ্বনাথত থকা বিশ্বনাথ বন্যপ্ৰাণী সংমণ্ডল আৰু নগাওঁত থকা  নগাঁও বন্যপ্ৰাণী সংমণ্ডলতো পৰ্যটনৰ নতুন নতুন কাৰ্যসুচী আৰম্ভ কৰা হৈছে ৷ যাৰবাবে কাজিৰঙালৈ অহা পৰ্যটকৰ সংখ্যাও বৃদ্ধি পাইছে ৷

চলিত বৰ্ষৰ ফেব্ৰুৱাৰী মাহত পূব অসম বন্যপ্ৰাণী সংমণ্ডলৰ পানবাৰীত বাৰ্ড চাফাৰী, কঁহৰা বনাঞ্চলত চাইকেল চলোৱাৰ ব্যৱস্থা , বিশ্বনাথ বন্যপ্ৰাণী সংমণ্ডলৰ পানপুৰ বনাঞ্চলত জীপ চাফাৰী আৰু নাও চাফাৰী আদিৰ দৰে কাৰ্যসুচী পৰ্যটকৰ বাবে হাতত লোৱা হৈছে ৷ ইফালে ৰাষ্ট্ৰীয় উদ্যানখনৰ পাৰিপাৰ্শ্বিক উন্নয়ন সমিতি বোৰৰ উদ্যোগত থলুৱা লোকে নিৰ্মান কৰা শিল্প কৰ্ম, খাদ্য সম্ভাৰ আৰু  বস্ত্ৰ শিল্পৰ সংগ্ৰহেৰে বাগৰি বনাঞ্চলত আৰম্ভ কৰা ইক’ শ্বপ নামৰ বিপনি খনে পৰ্যটকৰ পৰা সমাদৰ লাভ কৰিবলৈ সক্ষম হৈছে ৷ একেদৰে বুঢ়াপাহাৰ বনাঞ্চলত পাৰিপাৰ্শ্বিক উন্নয়ন সমিতিৰ দ্বাৰা পৰিচালিত চ'ৰেণ আহেম নামৰ কাৰ্বি জনগোষ্ঠীৰ খাদ্যৰ বিপনি খনে পৰ্যটকৰ লগতে অসম চৰকাৰৰ অসম গৌৰৱ বঁটাও লাভ কৰিবলৈ সক্ষম হৈছে ৷ এনে পটভুমিতেই যোৱা ১০ টা পৰ্যটন বৰ্ষৰ তুলনাত কাজিৰঙাত বছৰত মুঠ দৰ্শনাৰ্থী ৮ গুণ বৃদ্ধি পোৱাৰ উপৰিও বিদেশী পৰ্যটকৰ সংখ্যা ৪.৫ গুন বৃদ্ধি পাইছে ৷

**********