কাজিৰঙা ৰাষ্ট্ৰীয় উদ্যানৰ উদ্যোগত কমাৰগাওঁ মহাবিদ্যালয়ত বিশ্ব গঁড় দিৱস উদযাপন : সজাগতাৰ চাইকেল ৰেলী আৰু বাটৰ নাট প্ৰদৰ্শন :

কাজিৰঙা ৰাষ্ট্ৰীয় উদ্যানৰ উদ্যোগত কমাৰগাওঁ মহাবিদ্যালয়ত বিশ্ব গঁড় দিৱস উদযাপন  : সজাগতাৰ চাইকেল ৰেলী আৰু বাটৰ নাট প্ৰদৰ্শন  :

Aiidesh News  : ২২ চেপ্তেম্বৰ  :

বিশ্বৰ বিভিন্ন ৰাষ্ট্ৰৰ লগতে বিশ্বৰ ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যানেও আজি বিশ্ব গঁড় দিৱস উদযাপন কৰে ৷ কাজিৰঙাৰ পৰা ব্ৰহ্মপুত্ৰৰ চৰ চাপৰিলৈ ওলায় যোৱা গঁড়ৰ সুৰক্ষা প্ৰতি লক্ষ্য ৰাখি উদ্যান কৰ্তৃপক্ষই এই বাৰ দিনজোৰা কাৰ্যসুচীৰে বিশ্ব গঁড় দিৱস কমাৰগাওঁ মহাবিদ্যালয়ত উদযাপন কৰে ৷ 

গঁড় দিৱসৰ পুৱাই কাজিৰঙাৰ কহঁৰাৰ পৰা কমাৰগাওঁলৈ আৰম্ভ হয় এক সজাগতামুলক চাইকেল ৰেলী ৷ চাৰি ঘন্টীয়া এই চাইকেল ৰেলীত বোকাখাত, ৰজাবাৰী আৰু নুমলীগড়ৰ অঞ্চলৰ বহু ছাত্ৰ ছাত্ৰীয়ে অংশ গ্ৰহন কৰে ৷ কহঁৰাৰ বনাঞ্চলিক বিষয়া বিভুতি ৰঞ্জন গগৈয়ে কহঁৰাত আৰু পুৱ অসম বন্যপ্ৰাণী সংমণ্ডলৰ ডি এফ অ' ৰমেশ কুমাৰ গগৈয়ে বোকাখাতৰ সংমণ্ডল কাৰ্যালয়ত এই ৰেলীৰ ফ্লেগ অফ কৰে ৷ গঁড় দিৱসৰ লগত সংগতি ৰাখি ৰাষ্ট্ৰীয় উদ্যান কৰ্তৃপক্ষৰ সৌজন্যত বোকাখাতৰ নৱ নাট্য গোষ্ঠীৰ শিল্পী সকলে বোকাখাত, নুমলীগড় আৰু কমাৰগাওঁত গঁড় সংৰক্ষণ বিষয়ক বাটৰ নাট প্ৰদৰ্শন কৰে ৷ 

গঁড় আমাৰ জাতীয় সম্পদ ইয়াক ৰক্ষা কৰাতো অকল বন বিভাগৰেই নহয় সকলোৰে কৰ্তব্য - পৰৱৰ্তী সময়ত কমাৰগাওঁ মহাবিদ্যালয়ৰ প্ৰেক্ষাগৃত অনুষ্ঠিত হোৱা গঁড় দিৱসৰ মুল কাৰ্যসুচীত এই দৰে মন্তব্য কৰে কাজিৰঙাৰ সঞ্চালক যতীন্দ্ৰ কুমাৰ শৰ্মাই ৷ অনুষ্ঠানত পুৱ অসম বন্যপ্ৰাণী সংমণ্ডলৰ ডি এফ অ' ৰমেশ কুমাৰ গগৈ, কমাৰগাওঁ মহাবিদ্যালয়ৰ অধ্যক্ষা ড৹ বিজুলী বৰচেতীয়া, কাজিৰঙাৰ অতিৰিক্ত আৰক্ষী অধীক্ষক ধ্ৰুৱজ্যোতি নাথ, কাজিৰঙাৰ গৱেষণা বিষয়া ৰবীন্দ্ৰ শৰ্মা, সহকাৰী বন সংৰক্ষক চিৰঞ্জীৱ জৈন আৰু নয়নজ্যোতি ৰাজবংশী, জেষ্ঠ সাংবাদিক প্ৰদীপ কুমাৰ বৰা, কমাৰগাওঁ প্ৰেছ ক্লাবৰ সম্পাদক ৰিন্টু দুৱাৰ, বোকাখাত বনাঞ্চলৰ বনাঞ্চলিক বিষয়া মনজিত সোনোৱাল, বাগৰিৰ বনাঞ্চলিক বিষয়া বিবিধ দিহিঙীয়া, মহাবিদ্যালয় খনৰ শিক্ষক কৰ্মচাৰীৰ লগতে সমুহ ছাত্ৰ ছাত্ৰীয়ে অংশগ্ৰহন কৰে ৷ অনুষ্ঠানৰ আৰম্ভনীতেই বন্তি প্ৰজ্বলনেৰে বন আৰু বন্যপ্ৰাণীৰ সুৰক্ষাৰ বাবে প্ৰাণ আহুতি দিয়া বন ছহীদৰ বাবে স্মৃতি তৰ্পন কৰি এক মিনিট সময় মৌন প্ৰাৰ্থনা জনোৱা হয় ৷ 

কমাৰগাওঁ মহাবিদ্যালয়ৰ ছাত্ৰী সকলৰ দ্বাৰা পৰিবেশিত সমবেত সংগীতেৰে আৰম্ভ হোৱা অনুষ্ঠানৰ বন্তি প্ৰজ্বলনেৰে শুভাৰম্ভ কৰে কাজিৰঙাৰ সঞ্চালক যতীন্দ্ৰ শৰ্মাই ৷ আদৰণি ভাষণ প্ৰদান কৰে ডি এফ অ' ৰমেশ কুমাৰ গগৈ আৰু কমাৰগাওঁ মহাবিদ্যালয়ৰ অধ্যক্ষা ড৹ বিজুলী বৰচেতীয়াই ৷ অনুষ্ঠানত কাজিৰঙাৰ গৱেষণা বিষয়া ৰবীন্দ্ৰ শৰ্মা আৰু পৰিৱেশ কৰ্মী সাংবাদিক উত্তম শইকীয়াই কাজিৰঙা ৰাষ্ট্ৰীয় উদ্যান আৰু গঁড়ৰ বিষয়ে সচিত্ৰ উপস্থাপনেৰে ছাত্ৰ ছাত্ৰীৰ লগত মত বিনিময় কৰে ৷ অনুষ্ঠানৰ মাজতে সহকাৰী বন সংৰক্ষকে গীত পৰিবেশন কৰি সকলোকে আপ্লুত কৰাৰ উপৰিও ছাত্ৰ ছাত্ৰীৰ মাজত আকস্মিক বক্তৃতাৰ প্ৰতিযোগিতাও অনুষ্ঠিত কৰে ৷ অনুষ্ঠানৰ সামৰণীত আকস্মিক প্ৰতিযোগিতাত স্থান লাভ কৰা ছাত্ৰ ছাত্ৰী,  চাইকেল ৰেলীৰ অংশগ্ৰহনকাৰী আৰু বাটৰ নাটত অভিনয় কৰা শিল্পী সকলক মানপত্ৰ আৰু উপহাৰ প্ৰদান কৰা হয় ৷ শেষত মহাবিদ্যালয়খনৰ প্ৰবক্তা অঞ্জন জ্যোতি শইকীয়াই গঁড় দিৱসৰ সফলতাৰ বাবে সকলোকে ধন্যবাদ জ্ঞাপন কৰে ৷

*********